نام
حضرت غوث العالم محبوبِ یزدانی سلطان سید اشرف جہانگیر سمنانی قدس سرہ النورانی رحمتہ اللّٰه علیہ کااسم مبارک سید محمد اشرف یا سیّد اوحدالدین اشرف تخلص اشرف تھا ، اور سید اشرف کے نام سے مشہور ہوئے۔
والد گرامی
آپ کے والد کا اسم گرامی حضرت سلطان سید ابراہیم تھا جو سمنان کے تاجدار تھے ، اپنے والدگرامی سلطان سید عمادالدین کی وفات کے بعد تخت نشیں ہوئے، اور علاؤ الدولہ برمکی کو اپنا وزیر بنایا۔
آپ بڑے متقی وپرہیزگار، نیک دل، بااخلاق، خدا رسیدہبزرگ تھے ، اور سلوک ومشاہدات کی ساری منزلیں طے کرکے روحانیت کے اعلیٰ مقام پر فائز تھے، اور علم وفضل میں بھی ایک بلند مقام رکھتے تھے، چنانچہ حضرت غوث العالم نے اپنے ایک خط میں اپنے والد گرامی کا ذکر اس انداز سے فرمایا ہے:۔
”حضرت ابوی صاحب التاج والادرنگ وواہب الدواج والنیرنگ جامع العلوم الصوری والمعنوی ساطع الہموم المرتضوی والمصطفوی سیّد ابراہیم قدس سرہ۔“
ترجمہ: حضرت والد گرامی تاجدار، بلند مرتبہ بزرگ، قبا اور عجائبات عطا فرمانے والے علوم ظاہری وباطنی کے جامع ، نبی وعلی کے ارادوں کو جِلا بخشنے والے سید ابراہیم قدس سرہ۔
بہت سے طالبانِ راہِ معرفت وسلوک آپ کے زیر تربیت منزلِ مقصود تک پہونچے۔
خوارزم میں ایک شخص کو علوم ظاہری کے تحصیل کے بعد معرفت الٰہی کا اشتیاق ہوا اور راہِ سلوک میں رہنمائی حاصل کرنا چاہی ، حضرت خضر علیہ السلام نے اسے بشارت دی کہ سیّد ابراہیم کا دامن پکڑ لو جو رؤسائے نور بخشیہ میں ہیں، وہ آپ کی ارادت میں آکر سلوک میں شامل ہوا اور منزل مقصود تک پہونچا۔
آپ کے عہد حکومت میں سمنان نے بڑی ترقی کی، اور عام طور پر رعایا بڑی خوشحا ل تھی، اور ہر طرف امن وامان دور دورہ تھا، آپ نے علوم دینی پر خصوصی توجہ دی، آپ کے عہد حکومت میں بارہ ہزار طلباء علوم وفنون میں کامل وفاضل ہوکر نکلے اور بہت سی تصانیف آپ کے نام معنون ہوتیں، یہ صوفی مزاج اور علم دوست سلطان علماء ، فضلاء ، فقراء ومشائخ کے بھی بڑے عقیدتمند تھے۔
For Contact Us
Go to Contact Page
or
Mail:contact@makhdoomashraf.com
Cal:+91-9415721972